(រូបឈរកណ្តាលខាងស្ដាំ)៖ ប៉ុល ពត នាយករដ្ឋមន្រ្តី និងលេខាបក្សកុម្មុយនីស្តកម្ពុជា អមដោយ វ៉ាង តុងស៊ិន អនុប្រធានគណៈកម្មាធិការមជ្ឈឹមបក្សកុម្មុយនីស្តចិន។ (រូបនៅពីក្រោយ វ៉ាង តុងស៊ិន)៖ ខៀវ សំផន ប្រធានគណៈប្រធានរដ្ឋ កម្ពុជាប្រជាធិបតេយ្យ។ (រូបខាងឆ្វេងទី១)៖ ហ៊ូ យ៉ាបាង អគ្គលេខាធិការគណៈកម្មាធិការមជ្ឈឹមបក្សកុម្មុយនីស្តចិន។ (រូបខាងឆ្វេងទី២)៖ នួន ជា ប្រធានសភាតំណាងប្រជាជន និងអនុលេខាបក្សកុម្មុយនីស្តកម្ពុជា។

នៅថ្ងៃសុក្រ ទី១៦ ខែវិច្ឆិកា ឆ្នាំ២០១៨ តុលាការខ្មែរក្រហម បានសម្រេចផ្តន្ទាទោស នួន ជា និង ខៀវ សំផន ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងការបំពានយ៉ាងធ្ងន់ធរទៅលើអនុសញ្ញាទីក្រុងហ្សឺណែវឆ្នាំ១៩៤៩។ ឧក្រិដ្ឋកម្មទាំងនេះត្រូវបានប្រព្រឹត្តនៅតាមទីកន្លែងនានានៅ ទូទាំងប្រទេសកម្ពុជា ក្នុងអំឡុងរបបកម្ពុជាប្រជាធិបតេយ្យ ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩។ អង្គជំនុំជម្រះនៃតុលាការខ្មែរក្រហមបានសម្រេចផ្តន្ទាទោស នួន ជា និង ខៀវ សំផន ដាក់ពន្ធនាគារអស់មួយជីវិត។

នៅឆ្នាំ១៩៧៦ ប៉ុល ពត គឺជានាយករដ្ឋមន្រ្តីរបស់កម្ពុជាប្រជាធិបតេយ្យ ប៉ុន្តែបានលាលែងពីតំណែងនៅឆ្នាំ១៩៧៩។ ទោះបីជាយ៉ាងណាក៏ដោយ ប៉ុល ពត នៅតែជាមេដឹកនាំដ៏មានឥទ្ឋិពលរបស់ខ្មែរក្រហមដដែល។ ប៉ុល ពត បាននិរទេសខ្លួន ហើយភាគច្រើនរស់នៅក្នុងទឹកដីថៃរហូតដល់ថ្ងៃទី១៥ ខែមេសា ឆ្នាំ១៩៩៨ និងបានស្លាប់ដោយជម្ងឺបេះដូង នៅស្រុកអន្លង់វែងខេត្តឧត្តរមានជ័យ។ សពរបស់ ប៉ុល ពត ត្រូវបានបូជានៅថ្ងៃទី១៧ ខែមេសា ឆ្នាំ១៩៩៨។